TAHI

Tahi-tahion ni Inday
Sa iyang nagsingabot
Nga mga katuigan
Ang nagsiwil
Ug nangatastas
Nga mga adlaw
Ni Iya Ising

Sumpay-sumpayon
Ang mga rinetasong higayon
Sa suok nga gipadaplin
Sa nagkuray nga mga kamot,
Tingali nabugnawan
Sa pagtukaw
Sa matag gabii ug kadlawon.


Ukayon, hagpaton
Ang mga butones sa iyang daang daster
Nga maoy gilampin-lampin
Sa masusong mga adlaw ni Inday
Mga butones nga nangatangtang
Sa kagabok
Sa katuigan ni Iya Ising

Pulawan ni inday
Matag gabii
Mutindak sa makina
Maninguha
Hangtod mahuman
Ug masul-ob ang bestidang
Wa matiwas ni Iya Ising.