KANG DODONG UG SA UBAN PANG MGA SUNDALO SA ISLA SA SPRATLY

Taod-taod
Kilom-kilom na sad.
Mahimo na sigurong
Mupiyong,
Bisan kadiyot.

Apan asa kaha
Ipatong ni Dodong
Ang natun-ogang tingkoy
Nga ang isla
Gikampatan na man
Sa mga kinakhaan
Ug mga itlog
Sa mga lumad-langgam?

Asa man ni Dodong
Patuy-oron ang
Iyang mga tiil?
Nga matod pa sa mga
Silingang langyaw
Ang isla
Tumbanan na
Sa ilang mga tiil.
Gani ang ila kunong
Tingog
Mao ang dahunog
Nianang dagat.

Pahuway lang usa, Dong.
Mahimong sa suok na lang
Mutikungkong.

Basin ugma
Sa kaadlawon
Maunhan na nimo
Ang mga langgam
Ugma,
Ang imong mga tunob
Muangkon
Sa mga balas;

Mulakra,
Mulapos sa mamala
Dili gyud mapapas--

Bisag mugahob pa
Ang dagat.