TUGNAW

Misangyad na sa yuta ang
Mga sanga sa
Bombel ni Nanang;

Mihinay hinay nag
Kamang ang mga balili,
Padung sa nagliyok-liyok
Nga sementadong hagdan
Lahos sa among wanang;

Tingali mao na la'y mupuli
Sa dayak-dayak
Sa mga gagmayng tiil kanhi
Kauban sa mga pinutos
Nga mga karmelitos;

Milili na ang
Mga sanga sa acacia
Sa bintana ni Tatang;

Tingali natingala
Kung hain na ang
Mga agik-ik sa mga
Magpasabak nga
Nagkamuritsing sa latik
Sa biko ug putong pinalutaw
Ni Nanang.

Puno pa ang
Bayanan sa pilit ni Nanang
Apan bugnaw ang
Among abuhan.

Samtang
Nagduka na si Tatang
Sa may bintana
Nga gapaminaw
Sa mga amba ug
Hudyaka sa gawas;

Taod-taod duyugan na
Ni Tatang ug ni Nanang ang
Mga kinana-as
Sa nagsingabot
Nga tugnaw
Sa Pasko.