Sa pagka karon tuhuan ko ang mga bakak sa gugma
Dawaton ko ang mga pulang rosas sa kanhiay
Unya, humulan sa baso
Patidlumon sa tubig, unya simhut-simhuton.
Magdahum, maghulat nga mugamot, mamunga.
Sige, pasagdan ko ang kabuang ni Kupido nga
Magbuot-buot sa badlis sa palad ni Inday.
Paminawon nako ang mga ngiyaw,
Ang mga hamag-lamba sa biga
Sa mga iring sa among atop.
Sa makausa, magpailad na pud ko
Sa kagilok sa mga hapyod-boladas
Sa mga bag-ong manag-uyab.
Sa mga hunghong--
Kaluha sa imong mga gitik-gitik.
O, karong adlawa magpakarung-ingnon ko nga
Kining akong mga tiil wala bug-ati
Sa nagsaguyod nga kadena.
Sa makadiyot,kalimtan ko nga hangtud karon
Pabilin ako, nakondenar gihapon
Sa imong mga saad kaniadto.
No comments:
Post a Comment