Pila ba ka nagpitok-pitok nga bitoon
Ang imong gisabwag sa aping nianang langit?
Asa kaha sila paingon kung mapupos na ang ilang panahon
Sa kawanangan?
Apan sama nga sayod ka kung pila na ka gatosan nga mga bitoon
Ang nangapulpog ug nahanaw sa usa lamang ka pagpamilok
Sayod ako nga inihap mo ang kada lugas sa nagkadyutay kong mga buhok.
Sayod usab ako nga inig piyong sa akong mga mata unya
Mukayab ang akong galamhan didto sa kapunaw-punawan
Lagbas sa mga kabitoonan
Musuway sa makausa sa pagtuktok sa imong ganghaan
Maghulat sa imong tingog
Maghulat sa tanang tubag
Sa tanang hubad sa tanghaga
Sa imong puangod.
No comments:
Post a Comment