SA AKONG PAGPANGINHAS, MAGTINIIL

Inig hunas unya

Manginhas ra
Gihapon ko
Unya magtiniil
Pasagdi lang
Kung mutyabaw
Kung matunok na
Sa mga nagtikangkang
Nga tipaka sa mga
Kinhason nga
Hagbay rang
Gibiyaan sa mga umang
O kaha masamad
Sa mga sisi
Nga nagpangamay,
Nagsiwil-siwil.

Unsaon,
Ampay man
Ang init-init
Ug halang halang
Nga sinabawang
Kinhason pakapinag
Kagumkom nga pahiyom
Sa akong tupad.