Sige
Karong buntag
Lamyon ko ang tanan:
Ang inyong "May I go out,"
Ang mga nagpahipi
Ninyong balikas
Nga karon
Kalayaton padung
Sa akong dagway,
Ang mga katuwaron
ninyong panghuy-ab,
Ang galupad-lupad
ninyong mga huna-huna
sa tunga-tunga
Sa nagkalandrakas
ninyong "zero,"
Kay nasabyagan
Sa nagkadugong
"I don't know, Ma'am."
Sige,
Ihurot ang tanan
Iapil ang mga
Nangapan-os nga
Kasaba ni mamang
ug Tatang
Sinambogan sa
halang-halang nga
Tunglo.
Kay unya
Sa pagpamauli
Ninyong tanan
Manghilam-os ako
Atubangan
Nianang "blackboard,"
Papason ang tanan
Sa parat-parat
Nakong luha
Ug sip-on.
