INIG LURANG SA HUWAW

Ikaw
Nga ga-antaw
Nako
Dinhi sa tiilan
Sa imong anino
Nagpabiling habog.
Bisa gani ang mga tipaka
Sa mga nangapulpog
Mong mga damgo
Nagdumili sa pagkadugta
Nakiglayog sa pagkadunot.

Pasagdan ko ikaw.

Mahimong kanang
Nag-ngangang kahilom
Sa tunga-tunga natong duha
Molapus pa
Ngadto sa laing kalibutan,
Mukawot,
Mukutkot
Sa kahiladman
Ug lugpitan ang galamhan
Hangtod tukbon sa kalimot.

Sa gihapon
Pasagdan ko ikaw.

Kay
Bisan gani ang huwaw
Muabi-abi sa
Tinagsa-tagsang taligsik.
Kay ang huwaw
Mingawon sa mga hinuyop,
Mga Awit sa ulan--
Mga yanong pinisik
Sa bul-og,
Haguros,
Alimpos--
Mga pagtapion
Sa mga ngabil nga
Gawasnong makig-akub
Sa yuta.
Muhupay
Sa katig-a
Sa mamala.

Unya
Kung mulurang
Na ang huwaw.