SA DIHANG MIHUNGHONG KO SA KALENDARYO ATOL SA AKONG ADLAWNG NATAWHAN

Karong gabii,

Muhangad ako pag-usab

Mukapyot sa imong mga sidsid, mamasin:

Pabalikon pa ba kaha ko diha sa katapusan mong luna?

Mudagayday pa ba pag-usab

Ang napulo ka tuig nga 

Mihaguros, ni wa gani mananghid?

Dad-on mo pa ba kaha ko didto 

Bisan nalang sa mga pinisik sa kaniadto 

Nga misawom sa kalimot?

Apan para unsa pa

Aduna na man kahay laing tungtungunan

Ang napanday?

Tungtunganang mas halapad pa

Kay sa trayntay-uno ka buok nimong

Mga kinwadradong luna.

Busa sige,

Inig hangad nako kanimo karong gabii,

Palili-a nalang ko sa kinwadrado kong

Kaniadto.