SUGILANON ILAWOM SA NAAWOP NGA BUWAN

Niabot na diay unta ka
Wa man gud ko
Makaalinggat.

Dugay na ra
Ba unta
Kong nag-atang
Sa imong
Awit
Nga ako unyang
Laylayon.

Basin tungod
Pino ang mga
Dahunog
Sa imong mga
Gamiting nga mga
Tiil--
Aw, mga tiil na
Ba kaha kadtong
Nagtuhil-tuhil
Sa akong
Kinasuluran?

Kung mahimo
Unta gitambid
Ko na dayon ikaw
Sa tunga-tunga sa kangitngit
Ug kadanlog
Sa imong kalibutan
Aron dinhi ikaw
Magpabilin.


Unta,
Wa ka nadakin-as
Ug mubiya
Sa akong
Giandam nga
Balay-balay
Sa dugay nang
Panahon.


Miawas,
Miikyas ang
Imong gininhawa
Palayo sa akong
Gininhawaan;
Wa gani nako
Masawo
Arun sapnayon
Ug itisok pagbalik
Ug alimahon.

Wa ko man lang
Mahapyod
Ug mahalok-halokan
Ang wala pa gani
Mahulma mong
Mga aping.


Unta
Mitidlom
Ka pa ug dugay-dugay
Sa sulod
Ning namugnaw
Nga balay-balay
Aron
Ikaw suginlan
Sa mga parayeg
Ug uraray ni
Cinderella ug
Snowhite sa ilang
Mga prinsipe
Aron ikaw mahinanok
Pa gyud hangtod sa
Pagsubang
Sa ika-syam ka
Bulan;

Anak,
Saari ko,
Mubalik ka
Aron maminaw
Sa pagluray
Sa akong tingog.


Sa sunod nga
Pagsubang sa
Akong bulan.